वैशाख २०,पोखरा
पोखरा महानगरपालिकामा नेकपा एमालेका तर्फबाट उपमेयर पदमा उम्मेदवारी दिनुभएका मञ्जुदेवी गुरुङ्गले यसपटक मतदाताहरुले एमाले उम्मेदवारहरुलाई आत्मीयताका साथ न्यानो स्वागत गरेको बताउनुभयो । घरदैलोका क्रममा आफुले जनताबाट अपार माया पाएको अनुभव सुनाउनुभयो । ‘यो पाँच वर्षे कार्यकालमा म जनताको घर घरमा पुगेकी छु, उनीहरुको पिर, मर्का, समस्या बुझेकी छु, अब उनीहरुको सम्बोधन कसरी गर्ने पनि सोंचेकी छु, निवर्तमान उप–मेयर समेत रहनुभएका गुरुङ्गले बताउनुभयो ।
नेकपा एमाले प्रचार बिभागले गरेको स्थानिय तह निर्बाचन केन्द्रीत फेसबूक लाइभ कार्यक्रममा बोल्दै उहाँले अबको पोखरा कस्तो बनाउने भन्ने योजना एमालेसंग भएको दावी गर्नुभयो । ‘हामीसंग पोखराको त्रि–वर्षिय योजना छ, योजनामा पोखराका भावी कार्यक्रमहरु समेटिएका छन्’–गुरुङ्गले जनाउनुभयो ।
पछिल्लो समय पोखराको कार्यबाहक मेयर बनेर जिम्मेवारी समेत सम्हाल्नुभएका गुरुङ्गले आफु न्यायिक समितिमा रहेर काम गर्दा ‘न्याय नपाए पोखरा जानु’भन्ने वातावरण बनाएको उल्लेख गर्नुभयो । नगरको आर्थिक विकासका लागि करको दर होइन, दायरा बढाएर अघि बढ्नुपर्ने औल्याउनुभयो । साथै नागरिकलाई पनि कर तिरेको महशुस हुने वातावरण श्रृजना गर्नुपर्ने उल्लेख गर्नुभयो । हामीले वितेको पाँच वर्षमा गरेका नमुना कार्यहरुका कारण फेरीपनि जनताले एमालेनै खोजेको र फेरी एमालेनै रोज्ने विश्वास व्यक्त गर्नुभयो ।
